Hier volg ons kinders se natuurlike behoeftes en ritmes van kleins af. Ons bied ’n veilige, huislike omgewing gevul met liefde, aandag en geleenthede vir groei. Selfstandigheid word van vroeg af aangemoedig deur verskeie aktiwiteite wat aangepas is by elke kind se unieke ontwikkeling. Klein groepe verseker dat elke kind raakgesien word — een van Regio se belangrikste boustene.

Speel, kreatiwiteit en veiligheid vorm die kern van hierdie fase. Hierdie ouderdom staan bekend as die “ontdekkingsjare” waar nuuskierigheid die leerproses lei. Howard Gardner se veelvuldige intelligensies en Loris Malaguzzi se idee van die “100 tale” is daagliks hier sigbaar. Kinders leer toenemend om meer verantwoordelik te wees en word aangemoedig om onafhanklikheid te ontwikkel binne ’n veilige, stimulerende omgewing.

Op hierdie stadium is leerdergesentreerde ontdekking en spel krities. Gestruktureerde aktiwiteite word spelenderwys aangebied om leer in alle vakgebiede natuurlik te integreer. Gardner se intelligensies en Malaguzzi se 100 tale word deurlopend ingewerk, en humor en vreugde vorm deel van elke dag. Kinders ontwikkel nie net akademies nie, maar ook sosiaal en emosioneel, deur speelse leerervarings wat hul natuurlike nuuskierigheid koester.

Emosionele intelligensie staan sentraal in hierdie klas. Ons skep ’n warm, huislike atmosfeer waar liefde, aanvaarding en saamhorigheid beleef word — ’n ware “one big happy family”. In hierdie fase word kinders uitgenooi tot dieper gesprekke, die deel van belangstellings en die ontdekking van nuwe konsepte. Kreatiwiteit, samewerking en betekenisvolle spel vorm die basis van die program. Graad R is ’n jaar van groei, selfvertroue en voorbereiding vir die volgende groot stap in leer.

Daaglikse Program

06:30 – 07:30 | Aankoms & Vryspel
Kinders arriveer, vestig hulself en geniet ’n rustige begin van die dag deur vryspel.

08:00 | Ontbyt
’n Voedsame maaltyd saam met maats. Leerders kry elke dag ’n keuse van ontbytpap om die dag gesond en energiek te begin.

08:30 – 10:00 | Oggendaktiwiteite

• Kringgesprek om die dag te begin

• Beweging of musiek vir energie en pret

• Kreatiewe werk en projekte wat verbeelding en vaardighede ontwikkel

10:00 | Broodjie Tyd
’n Ligter peuselhappie saam, wat volgens leerders se voorkeure voorberei word.

10:30 – 11:30 | Buite-avontuur & Storie
Kinders geniet speeltyd buite en sluit af met ’n storie om verbeelding en luistervaardighede te versterk.

12:00 | Middagete
’n Voedende ete saam in ’n gesellige atmosfeer. Middagete word elke dag vars voorberei uit oorspronklike bestanddele om kinders die beste balans van smaak en gesondheid te bied.

12:30 – 14:00 | Vryspel & Ontspanning
Kinders kry tyd vir oop spel en rustige aktiwiteite voor skool afsluit.

14:00 | Skool Eindig
Die formele skooldag eindig om 14:00.

Middag-opsies

14:00 – 17:30 | Middagprogram
Vir gesinne wat ’n later opsie benodig, is daar ’n verlengde program tot 15:00. Leerders ontvang nog ’n broodjie en ’n vrug as peuselhappie.

15:00 – 17:30 | Naskoolprogram

Vir gesinne wat ’n langer opvangsopsie benodig, bied ons ’n sorgsame naskoolprogram tot 17:30. Kinders geniet ’n veilige omgewing met tyd vir vryspel, rustige aktiwiteite en kreatiewe besigwees totdat hulle opgehaal word.

Kleredrag:

• Enige gemaklike kleredrag is aanvaarbaar.

• 2 stelle ekstra klere vir ingeval van mors of speel.

Bring saam:

• ’n Gemerkte waterbottel

• Sonroom

• Doeke en boudsalf (waar nodig)

Indien daar enige spesiale eetbehoeftes is, kan ouers vir hul kinders ’n kosblik saamstuur. Enige vrae rondom wat saamgestuur moet word kan gerus tydens die ouer-ontmoeting bespreek word.